Piinsi tassaavoq Ilagiit inuuissiortarfiat aamma Anersaaq Illernartoq pillugu nalliuttorsiorneq. Nalliuttorsiutigisaratsigu Anersaap Illernartup nunarsuarmukarnera, inuit akornanni upperneq, neriunneq ataatsimoornerlu pilersillugit.

Piinsi tassaavoq Ilagiinni nalliuttorsuit pingajuat, soorlu juulli Poorskilu aamma nalliuttorsuusut. Oqaaseq piinsi grækesisut tassaavoq pentekoste. Isumaqartoq kisitsit 50, tassani pineqarpoq Poorskip kingorna ullut 50-issaanni piinsertarmat.

Piinsip ullua tamatigut sapaataasarpoq. Taava Piinsip ulluata aappaa tamatigut ataasinngornikkut pisarpoq.

Ilagiit inuuissiornerat

Piinsimi ilagiit kristumiuusut pilersinneqarnerat nalliuttorsiutigineqartarpoq. Tassani nalliussisaratsigu Guutip anersaava – Anersaaq Illernartoq, nunarsuarmukarnera aamma inuit akornanni uppernerup neriunnerup ataatsimoornerullu pilersinneqarfiat.

Anersaaq Illernartoq ajoqersukkanut annguppoq, ullut 50-erpiaat Jiisusip toqusunit makinnerata kingorna. Ajoqersukkat silarsuarmut aallartitaapput upperisap suuneranik siammarterissallutik. Guutip anersaamik tunisineranut ersiutitut nunarsuarmi tamarmi inuiassuit oqaasii assigiinngitsut oqaasiinik atuisinnaalerput paasinnissinnaalerlutillu. Taamaalilluni kristumiut siulliit ataatsimoornerat pilerpoq, ilagiit aallartipput. Taamaattumik Piinsi ilagiit inuuissiortarfiannik aamma taaneqartarpoq.

Piinsimi oqaluttuami tupinnartumi pisimasoq isumaqarpoq, Guuti silarsuarmeeqqilersoq. Soorlu Guuti Ernermigut Jiisusikkut tamaaniissimasoq – Ataatap aamma Ernerup – maanna Anersaakkut Illernartukkut silarsuarmiittoq. Jiisusip ataatsimoorneq pilersitaa nunarsuarmi, toqusoq aammali toqusunit makittoq, ulloq taanna nunarsuarmi siammarterneqalerfigaa.

Juutit Piinsisiortarfiat

Aallaqqaammut Piinsi juutit nalliuttorsiortarfigaat, juutit poorskisiornerminnik naggasiiffiat aamma eqqaaniaaffiat Mosesip Sinaip qaqqaani Inatsisinik qulinik tunineqarneranut. Juutit piinsisiornerat tassaavoq naatitanik katersuinermi nallittorsiorfik, taamaaliortarpullu Jerusalemimukaallutik. Taamaakkami Piinsip nalaani Jerusalem inuiappassuit assigiinngitsut katersuuffigisarsimavaat. Ilagiit ileqqoq tamanna nammineq pimittut ingerlateqqissimavaat, namminerlu nutaamik isumalerlugu, tassa Anersaap Illernartup silarsuarmukarnerata nalliuttorsiutigineranik nassuarlugu.

Anersaaq Illernartoq – takussaanngitsoq najuuttorli

Anersaaq Illernartoq, Piinsimi nalliuttorsiutigisarput paasiuminaassinnaavoq. Takuneqarsinnaanngilarmi, malugineqarsinnaavorli. Anersaaq Illernartoq ataasiullunilu pingasuusumut atavoq, soorlu Upperisamik nassuerummi oqartartugut ataasiullunilu pingasuusoq tassaasoq Ataataq, Erneq aamma Anersaaq Illernartoq. Anersaajugami tigussaasumik ersittoqanngilaq.

Anersaaq Illernartoq takorlooraanni Guutip pissaanersuarigaa, taannaasorlu uppernermik aamma neriunnermik inunnut tunisisuusoq, aamma inunnik ataatsimoorusulersitsisuusoq paasiuminarnerulersarpoq. Anersaaq Illernartukkut Guuti inuit akornanni najuutilerpoq.

Anersaaq Illernartoq anorimut aamma anersaartornermut eqqaanarneruvoq, takussaanngikkaluarluni inuit inuuneranni pingaaruteqartorujussuaq.

Anersaaq Illernartoq takussaanngimmat assersuutitigut eqqartornerusarparput.

Anersaaq Illernartoq assilianngortillugu atorneqakkajuttarput tui, inneq aamma anori.

Piinsimi ilisarnaat

Anersaaq Illernartoq tassaavoq Guutip takussaanngikkaluarluni najuunnera. Taamaattumik assiliannguilluta aamma ilisarnaatitigut eqqartortarparput. Ilisarnatit atorneqarnerusartut pingasut tassaapput tui, inneq aamma anori.

Piinsi biibilimi

Piinsi biibilimi oqaluttuanut allanut sanilliullugu pissanganartumik oqaluttuarineqanngilaq, naak juullimi aamma poorskimi pisimasut taamaattut.

Anersaaq Illernartup ajoqersukkanut takkunneratut oqaluttuarineqarpoq, oqqat innertut ittut oqaatsinik assigiinngitsunik oqalussinnaalersitsisut, taamaalisinnaalernikkullu inuit allamiuugaluartut paasineqarsinnaalersut.

Tassa Piinsimi pisimasoq tigussaasumik pisoqarfiunngilaq, kisiannili assigiinngitsutigut nassuiarneqarsinnaalluni. Taamaakkami Piinsimi taalliarpalaartumik aammali assilianngortitsineq pingaaruteqartuupput.

Ajoqersukkat silarsuarmut aallartitaasut

Lukasip iivangkiiliuani atuarsinnaavarput, Jiisusi qilaliartitaannginnermini, ajoqersukkani neriorsorai, pissaanermik qutsissumit tunineqarumaartut, taannaavoq Anersaaq Illernartoq. Jiisusi ajoqersukkani Jerusalemimukaqquai tassanilu utaqqeqqullugit, Anersaap Illernartup tikikkumaarmagit. Taamaalioreerunik ajoqersuiartornissaminnut piareerumaarmata. Ajoqersukkat Anersaaq Illernartukkut piginnaatinneqalerput, anersaami aallartinneqaramik silarsuarmut tamarmut Jiisusi Kristusi oqaluttuareqqullugu.

Apustilit Suliaanni allassimavoq oqaluttuarineqarlunilu, qanoq ililluni Anersaaq Illernartoq Jiisusip qilaliartitaareernerani ajoqersukkanut anngussimasoq, taakkua Jerusalemimi ataatsimoorneranni. Eqqumiitsumik pisoqarneratigut allamiut oqaasiinik paasisinnaalerput aamma allamiutut oqalussinnaalerput. Taava silarsuarmut aallartitaapput, Jiisusi Kristusi pillugu oqaluttuaq siammarteriartorlugu.

Piinsimi pisimasoq Biibilimi, Apustilit Suliaanni kap.2 vers 1-13-imi atuarneqarsinnaavoq uani: http://old.bibelselskabet.dk/grobib/web/bibelen.htm

Paasissutissat danskisuut uaniittut kalaallisuunngortinneqarput: https://www.folkekirken.dk/aarets-hoejtider/pinse