Ulloq 14.januar 2024 Kunngi Frederik qulingat suaarutigineqartussaammat. Kiisalu ulloq 21.januar 2024 persuarsiortumik naalagiuserineqartussaalluni. Qularnanngimmallu kalaallit malinnaarrattussaasut, taamaattumik matumuuna Kalaallit Nunaat tamaat ilagiit sinniisaat ataasiakkaarlutik qinnuteqanngikkaluartut ataatsimut akuersivunga, sapaatini 14. Aamma 21.januar 2024 naalagiarnerit nal.09.00 aallartissinnaasut.
Kiisalu naalagiarnerup naalernerani alterimit qinnut Alterbogimi qinnut nr.n qupperneq 297-miittoq atorneqaqqullugu, ima:
14.januar 2024 nal.09.00
Dronningi pillugu
Ajugaqanngitsutit naassaanngitsutillu Guuti-aa! Assannik pissarsuarnik nunarsuarmi naalagaaffiit tamaasa najummigakkit, kisivillu eqqissisimatitsillutillu ilagiissitit sernissorakkit ussernartuni navianartunilu tamani, qanilaarluta qinnuigaatsigit Ataataq saammaasutit-aa, dronningerput Margrethe aappaat naalagaaffialu Guutiussutsivit sernissuineranit paarineqaqqullugit.
Siunnersuutai pilersaarutaalu ativit illernartup naalannaatissaanut siulersorlugillu ingerlatittakkit, innuttai tamatigut eqqissisimasumik Guutimillu mianerinnittumik pissusissaq eqqorlugu inooqqulluta, Ernerit asanartoq, Jiisusi-Kristusi, Naalagarput, pissutigalugu; taanna inooqatigalugulu naalagaaqatigigakku Anersaaq Illernartoq ataasioqatigalugu; kisivit ilumut Guutiusutit naassaanngitsumik. Amen.
21.januar 2024 nal.09.00
Kunngi pillugu
Ajugaqanngitsutit naassaanngitsutillu Guuti-aa! Assannik pissarsuarnik nunarsuarmi naalagaaffiit tamaasa najummigakkit, kisivillu eqqissisimatitsillutillu ilagiissitit sernissorakkit ussernartuni navianartunilu tamani, qanilaarluta qinnuigaatsigit Ataataq saammaasutit-aa, kunngerput Frederik qulingat naalagaaffialu Guutiussutsivit sernissuineranit paarineqaqqullugit.
Siunnersuutai pilersaarutaalu ativit illernartup naalannaatissaanut siulersorlugillu ingerlatittakkit, innuttai tamatigut eqqissisimasumik Guutimillu mianerinnittumik pissusissaq eqqorlugu inooqqulluta, Ernerit asanartoq, Jiisusi-Kristusi, Naalagarput, pissutigalugu; taanna inooqatigalugulu naalagaaqatigigakku Anersaaq Illernartoq ataasioqatigalugu; kisivit ilumut Guutiusutit naassaanngitsumik. Amen.
Inussiarnersumik Inuulluaqqusillunga
Paneeraq Siegstad Munk
Biskoppi