Tussiarfissuaq Alterbogimiippoq, taanna Ataqqinartorsuarmit Dronning Margrethe II-mit atortussanngortitaavoq (2005). Taamaakkami nalliuttutut naatsersuussaanera Biskoppimit attatiinnarneqarnissaa aalajangiusimaneqarpoq. Nalliuttut suuneri Ilagiinni ingerlatsinerup iluaniittuusut malugeqqunarpoq, aamma nalliuttut suunerisa aalajangersarnissaat Inatsisartuniit allanngortinnissaanik saqqummiussinissaq kissaatiginngilara.
Innersuussutigaarattaaq ullut suut sulinngiffiussanersut Naalakkersuisut aamma Sulisoqarnermut kattuffiit isumaqatiginniarnermikkut susassaqarfianiimmata. Neriuutigaara Tunngaviusumik Inatsimmi §4 suli ataqqineqarluni Naalagaaffimmit attatiinnarneqassasoq, tassa nalliuttut tassaasut aamma ullut sulinngiffiusut. Aamma Inatsisartut Ilageeqarneq pillugu inatsisaanni §2 innersuussutigalugu ataqqeqquara Namminersorlutik Oqartussat ilageeqarnermi ullut nalliuttut attatiinnarneqassasut aamma nalliuttut suli tassaassasut sulinngiffiusut.
Tussiarfissuup nalliuttuujunnaarsinneranik eqqarsaatit tassaapput ilageeqarnerup susassaqarfiinut akulerunneq, Kristian Jeremiassenip taama eqqarsarnera ilageeqarnerup susassaqarfianut akulerunniarneruvoq.
Ukioq 1686 Christian den V nutaamik inatsisiliorpoq, taamani ukiumut ullorpassuit peqqissiminermut qinuffittullu atorneqartartut Sjællandimi Biskoppiusoq Hans Bagger oqaloqatigereerlugu peqqussuteqarami. Peqqussummi allaqqavoq Tussiarfissuaq inissisimassasoq Poorskip kingorna tallimanngornerit sisamaanni. Taanna oqaluttuarisaanermi ileqqoq malillugu kingullermik nunatsinni Alterbogi 2005-imi atortussanngortinneqartumi ingerlateqqinneqarpoq, taallugu “Tussiarfissuaq”.
Ukiut ingerlanerini Tussiarfissuup sumut atortarneranik isumalersuineq nunatsinni nikerarpallaarsimanngilaq. Aallaqqaammut tunngaviusoq ilagiit ullormi tassani tateqarnerup qinunermullu piffissaqarnissamik, aamma peqqissimissuteqarnermi kiisalu eqqisseqatigiinnissamik ajortumillu pineqannginnissamut illersorneqarnissamik qinuffittut atorneqartarsimavoq.
Ukiuni kingullerni nunatsinni ulloq taanna Apersortiffittut atorneqaleriartuinnarpoq.
Naalagaaffeqatigiinni biskoppit ukioq manna ilagiit kajumissaarpaat Tussiarfissuarmi eqqisseqatigiinnissaq nunarsuarmilu eqqissinissaq qinnumminni ilannguteqqullugu. Nunarsuarmioqataanitsinni aatsaat taama pingaartigilerpoq eqqissinerup qinnutigineqarnissaa, inuiaqatigiinnilu toqqissinanngitsut amerliartortillugit tamakkua noqqaassutigiuartariaqarpagut.
Biskoppip nalliuttut kristumiusut oqaluussiffittut aammali inuiaqatigiit ataatsimoorfiattut nalituutut isigai. Nalliuttut piffissaqartilersarpaatigut qasuersilaarnissamut, akornusersorneqarata eqqarsaqqilaarnissamut aammali nammineq aalajangerlugu soqutigisatta piffissaqarfigilaarnissaannut.
Taamaattumik Biskoppip pissusissamisoortutut isiginngilaa Kristian Jeremiassenip Tussiarfissuarmik atorunnaarsitsiniarnera.
Inussiarnersumik Inuulluaqusillunga
Paneeraq Siegstad Munk
Biskop