Biskopi Paneeraq Siegstad Munk Nuummi ukioq manna ulloq 10. oktober Hans Egede-ip oqaluffiani immikkut naalagiartitsinermi biskopinngortinneqassaaq.

Ulloq 1. december 2020-mi Paneeraq Siegstad Munk biskopitut sulilerpoq, taamaasillunilu siulini soraarneq Sofie Petersen, Kalaallit Nunaata biskopeqarfiani ukiuni 25-ni biskopioreersimasoq paarlallugu.

Biskopinngortitsinissaq ulloq 22. november 2020-imi pisussaasimagaluarpoq, taamanili angalasinnaanermut katersuussinnaanermullu maleruagassaasut pissutigalugit, biskopinngortitsinissaq nalinginnaasumik ingerlanneqaqqissinnaalernissaanut kinguartinneqassasoq aalajangiunneqarpoq.

Maannamut angalasinnaanermut katersuussinnaanermullu maleruagassat imaalersimapput biskopinngortitsinissaq pisinnaalerluni, taamaasillunilu Nuummi ulloq 10. oktober nal. 13 Hans Egede-ip oqaluffiani immikkut naalagiartitsinermi pissalluni. Tamatuma kingunerani ilagiinnut Nuummi Katuami kaffillertoqassaaq, ullormullu persuarsiorneq naggaserlugu unnukkut nereqatigiinneqassalluni.